جرو التابلو ---بقلم ..... اسعد البعيجات
أول مرة شفت جرو التابلو على سيارة ابن عمتي كرِيّم .. كان الجرو قُدِّ القنفد أولها فكرته حقيقي ... بهز براسه بدون كهرباء .... بحبشت بعيوني حتى لا يفكرني أبن عمتي إني غشيم حتى اشوف انه موصول بالبطارية ... طلع مش موصول ... طول الطريق وانا مع ابن عمتي اختلس النظر على هالجرو وطريقته بهز رأسه وعدم إعتراضه على سواقة ابن عمتي. سرعة زايدة .... ومع ذلك الجرو بهز برأسه يعني زي الي بقول ادعس بنزين على ٩٩ ... قطع إشارة ضوئية حمراء ... والجرو بهز براسه وكأنه يقول ان ما جمرت ما بتزبط... تجاوز عن تريلا والجرو لا يزال يهز براسه اخذ يمين بدون غماز والجرو يهز براسه .... تزمير كأنه في عرس والجرو يهز برأسه ويعطي ابتسامات بالفعل كان مستفز هالجرو مع كل هالتجاوزات والمخالفات ويهز برأسه ... اخر اشي قلت يا ابن عمتي : اعمل الي بدك اياه من مخالفات وتجاوزات بس مشان الله شيل الجرو من على التابلو ... قلي : ولو يا ابن خالي ... على حسابك الجرو والتابلو .. مسك الجرو ورماه على طول أيده من الشباك واستمرينا بالمخالفات والتجاوزات .. احيانا لما تعمل خطأ او تجاوز والذي مقابلك يهز برأسه بالموافقة تشعر ان الوضع مش مزبوط وتفضل ان تعمل الأخطاء بدون ما حدا يُثني عليك ... تشعر ان هزة الرأس فيها استهبال . من المؤلم ان يتقمص المسؤول وظيفة جرو التابلو على مدار ١٥ سنة الماضية دون كلل وملل ويستمر في هز رأسة بكل مناسبة وكل قانون لتصل المديونية الى ارقام غير مسبوقة خلال فترة وجيزة وما تبعه من بيع للممتلكات العامة بأبخس الأثمان ... الم تحن الفرصة ونحن على أبواب الانتخابات ان نرمي جرو التابلو من الشباك . وان نرفض كل هذا التهميش بحق الوطن برفض المشاركة بعملية وهمية منزوعة الدسم لا يُعلم قُرمية جدها كل ما يُراد منها فرز المزيد من جراوة التابلو .
