مصري في الاردن يعيد حواله ٢٤٩٠ دينار وصلت لمحفظته بالخطأ

البلقاء اليوم - في زلمة مصري بشتغل بالأردن، وتحديدا بمدينة الكرك، من حوالي ١٧ سنة.

اسمه #طارق #محمد #عبدالله #أبو #جبة

صحي طارق من نومه بحدود الساعة ٧ الصبح، وتطلع على تلفونه، وإذ بلاقي حوالة مالية واصلة على حسابه!

مش ٢٠ دينار، ولا ١٠٠ دينار.

٢٤٩٠ دينار بالضبط، واصلين له عن طريق كليك!

طارق استغرب من المبلغ، وظل يتطلع على تلفونه ويستنى حدا يتواصل معاه.

وبقول:

"لا حد حكى معي، ولا حد رن علي يبلغني إنه الحوالة وصلتني بالغلط!"

كان ممكن يسكت ويستنى يشوف شو رح يصير، لكنه حس إنه شايل أمانة كبيرة، وإنه ممكن يكون ورا هاي الحوالة إنسان محتاج ومستني هالمبلغ على أحر من الجمر.

ومع هيك، طارق ما بده يتأخر عن شغله.

راح على دوامه، وهناك عرض الموضوع على شخص اسمه الأستاذ سامر، وحكاله عن الحوالة اللي وصلت على حسابه.

وبقول طارق:

"حسيت بخوف ومسؤولية وحمل الأمانة، ويمكن الشخص كبير بالسن، وبده يحول رسوم دراسة ابنه أو شيء!"

يعني قبل ما يفكر بالمبلغ، فكر بصاحبه.

فكر إنه ممكن يكون أب جمع هاي المصاري حتى يدفع رسوم دراسة ابنه، أو إنسان كبير بالسن أخطأ بالرقم، وقاعد هسا محتار ومش عارف وين راح تعبه.

بعدها، توجه طارق للبنك، وحكالهم القصة من أولها لآخرها.

الموظفين في البنك شكروه على أمانته، واتخذوا الإجراءات اللازمة، ورجعوا المبلغ كامل للشخص اللي حولهم له عن طريق الخطأ.

ولما حكى طارق عن موقفه، اختصر كل الحكاية بجملة جميلة، وقال:

"تعلمنا كل ما يرضي ربنا سبحانه وتعالى!"

القصة، نقلا عن قناة العربية الأردن، مش بس عن حوالة وصلت للشخص الخطأ ورجعت لصاحبها.

هي قصة زلمة عاش بين أهل الكرك ١٧ سنة، وأثبت إنه الأمانة ما إلها جنسية، وإنه ابن الأصول بظل ابن أصول وين ما كان.

بارك الله فيك يا طارق، وبارك بأمانتك.

فعلا، أنت زلمة أصيل!

وبرضه هاي رسالة مهمة للجميع،
إذا وصلكم أي مبلغ بالخطأ، لا تتصرفوا فيه، ولا ترجعوه لحساب يرسله شخص مجهول.

تواصلوا مباشرة مع البنك، وخلوا إعادة المبلغ تتم بشكل رسمي وآمن، حتى تحفظوا حقكم وحق صاحبه.

"صورة طارق محمد عبدالله أبو جبة"

---